Islandiya poytaxti Rekyavik shahrida umumiy mukofot jamg‘armasi 400 000 dollarni tashkil etuvchi «Fischer Random World Chempionship-2022» turnirida hamyurtimiz Nodirbek Abdusattorov muvafaqiyatli ishtirokini davom ettirmoqda.
Musobaqada 8 shaxmatchi ikki guruhga bo‘lingan holda bahslarda ishtirok etishmoqda. Guruh bosqichida har bir sportchi o‘zaro ikki martadan to‘qnash kelishadi va har bir to‘qnashuv ikkita o‘yindan iborat bo‘ladi.
Abdusattorov kecha 3 va 4-tur doirasida islandiyalik Xyyorvar Steyn Gretarssonga qarshi 4 partiya o‘yin o‘tkazdi hamda ularning barchasida g‘alaba qozondi. Shu tariqa, hamyurtimiz 8 imkoniyatdan 7,5 ochko to‘plagan holda "A" guruhida muddatidan avval yarim final yo‘llanmasini qo‘lga kiritdi.
Ushbu guruhda rossiyalik Yan Nepomnyashchiy 5 ochko bilan 2-o‘rinni egallab turgan bo‘lsa, AQSHlik So Uesli hisobida 3 ochko mavjud. Gretarsson esa 0,5 ochkoga ega.
Abdusattorov bugun guruh bosqichining so‘nggi 2ta tur bahslarini (Nepomnyashchiy va Uesliga qarshi) o‘tkazadi hamda guruh peshqadamligin saqlab qolsa, yarim finalda "B" guruhida 2-o‘rinni egallagan shaxmatchi bilan yarim finalda to‘qnash keladi. Bu guruhda Nakamura (AQSH) va Magnus Karlsen (Norvegiya) guruhdan chiqish uchun asosiy da’vogar bo‘lib turishibdi.
