«Real» hujumchisi Karim Benzema «Oltin to‘p»ni qabul qilib olishga jiddiy hozirlik ko‘rganini qo‘lidagi soati bilan ham bilintirib qo‘ydi.

Fransiyalik yangi laureat Parijdagi marosimda bahosi 435 ming funtga teng Richard Mille qo‘l soatini ko‘z-ko‘z qildi. Taqqoslash uchun aytsak, Benzemaning so‘rovdagi raqiblaridan biri Robert Levandovski marosimga Cacio brendiga mansub oddiy soatni tanladi. Marca ma’lumotiga qaraganda, ushbu qo‘l taqinchog‘ining bahosi juda past - atigi 52 funt.

Umuman, 34 yoshli Karim Benzema taqdirlash marosimida o‘ziga xos kiyinish uslubini ko‘rsatdi. Tanlangan uslub unga sahnada jumladan, deyarli yarim million funt turadigan Richard Mille soatini yaqqol reklama qilish imkonini berdi. Ta’kidlanishicha, Benzemaning qo‘l soati unga eng murakkab davrlarni eslatib turadi. Aniqrog‘i, Matyo Valbuena bilan yuzaga kelgan mashhur mojaro tufayli Fransiya terma jamoasidan haydalgani, «Real»da esa Krishtianu Ronaldu soyasida qolib ketganini. Aytishlaricha, Karimning sevimli matohi maxsus buyurtma asosida tayyorlangan. O‘z o‘rnida aytish kerak, hujumchi «Real»da haftasiga 275 ming funt miqdorida maosh oladi. Yillik ish haqi esa 62,5 million funtga yetadi. Bas shunday ekan, Benzema uchun bunday qimmatbaho soat olish cho‘t emas. Axir atigi 2 haftalik maoshi yetadi.

«Oltin to‘p» uchun yana bir da’vogar Robert Levandovski esa marosimda hammasi oddiyroq bo‘lishini ma’qul ko‘rdi. U marosimga rafiqasi Anna hamrohligida bordi, qo‘lida esa 52 funtlik Cacio soati bor edi. Polshalik goleador «Barselona»da Karimga nisbatan deyarli ikki baravar kam maoshga ega - haftasiga 150 ming funt. Ikkinchi tomondan, Levagolning yillik daromadi 75 million funtni tashkil etadi. Qisqasi, umumiy topishi Benzemanikidan yaxshiroq.

Alohida fakt: Benzema yaqin orada Levandovskidan ikki marta ustun keldi. Birinchisi - Karim «El-klasiko»da gol urdi va «Real» asosiy raqibi «Barselona»ni osongina (3:1) mag‘lub etdi. Ikkinchisi - Benzema «Oltin to‘p» so‘rovida 1-o‘rinni oldi, Levandovski esa 4-pog‘ona bilan cheklandi. Bunga qo‘shimcha tarzda fransiyalik to‘purar dabdabali qo‘l soati masalasida ham polshalikdan yaqqol ustun ko‘rindi.