«Napoli»ning uy arenasi - «San-Paolo»da klub afsonasi marhum Diyego Armando Maradona sharafiga yangi haykal o‘rnatildi

Yer yuzida argentinalik «Futbol raqqosi»ning yodgorlik monumentlari juda ko‘p. Ulardan ko‘pini Diyegoning o‘zi ham ko‘rgan. Chunki futbolchi tirikligidayoq joylarda haykal o‘rnatish asnosida uni alohida sharaflashgan. Lekin «A» seriya 12-turidan o‘rin olgan «Napoli» - «Sassuolo» (4:0) o‘yini oldidan ochilgan yangi haykal o‘zgacha - chap oyog‘i oltin tusda, yana butsasiz. Ha, bu monument endi neapolliklarga marhum yulduz chap oyoqda naqadar kuchli bo‘lganini eslatib turadi.

Diyego Maradona agar hayot bo‘lganida, 31 oktyabr kuni 62 yoshini qarshi olardi. Argentinalik futbol dahosi 1984-1991 yillar oralig‘ida «Napoli»da o‘ynab, butun Neapol tarixida chuqur iz qoldirgan. «Napoli» aynan o‘sha darvda Italiya chempionatida 2 marta zafar quchgan, shuningdek, mamlakat kubogi va superkubogini yutishdan tashqari, klub muzeyini UYEFA kubogi bilan ham bezagan.

«Oltin to‘p»ning birinchi faxriy sohibi va Argentinaning XX asrdagi eng yaxshi sportchisi sifatida tan olingan Diyego Armando yorqin futbolchilik faoliyati davomida 676ta rasmiy o‘yinda ishtirok etib, 345ta gol va 80ta samarali uzatma muallifiga aylangan. Buning samarasi - 25ta sovrin. Don Diyego jumladan, 1986 yilgi JCHda turnirning bosh qahramoni sifatida jahon kubogini boshi uzra baland ko‘targan.