Iordaniyaning Amman shahrida boks bo‘yicha Osiyo chempionatida yarim final bahslari doirasida kechki dasturdan o‘rin olgan janglar davom ettirilmoqda.

Musobaqa kashfiyotlaridan biri bo‘layotgan o‘zbekistonlik 63,5 kilo vazndagi sportchi Ruslan Abdullayev final yo‘llanmasi uchun Xitoy Taypeyidan tashrif buyurgan Chu En Laiga qarshi ringga ko‘tarildi.

Hamyurtimiz jang davomida to‘liq ustunlikka erishdi va raqibiga hech qanday imkoniyat qoldirmadi. Hattoki birinchi bo‘limda raqibini nokdaun holatiga tushirdi. Yakuniy baholar — 5:0 (30:27, 30:27, 30:27, 30:27, 30:26).

Shu tariqa, finalga chiqqan O‘zbekiston erkaklar terma jamoasi a’zolari soni besh nafarga yetdi. Avvalroq Saidjamshid Ja’farov, Lazizbek Mullojonov, Hasanboy Do‘smatov va Abdumalik Xalakov finalga yo‘l olgan, Shahzod Muzaffarov, Adhamjon Muhiddinov va Asadxo‘ja Mo‘ydinxo‘jayev yarim finalda yengilib, bronza medaliga ega chiqqani xabar qilingandi.

10 noyabr kuni yana quyidagi bokschilar o‘z jangini o‘tkazadi:

-80 kg: Odiljon Aslonov — Omurbek Bekjigit uluu (Qirg‘iziston) (22:00 dan so‘ng)
-92 kg: Madiyor Saidrahimov — Ahmat Sulayman (Iordaniya) (22:30 dan so‘ng)