Иорданиянинг Амман шаҳрида бокс бўйича Осиё чемпионатида ярим финал баҳслари доирасида кечки дастурдан ўрин олган жанглар давом эттирилмоқда.

Мусобақа кашфиётларидан бири бўлаётган ўзбекистонлик 63,5 кило вазндаги спортчи Руслан Абдуллаев финал йўлланмаси учун Хитой Тайпейидан ташриф буюрган Чу Эн Лаига қарши рингга кўтарилди.

Ҳамюртимиз жанг давомида тўлиқ устунликка эришди ва рақибига ҳеч қандай имконият қолдирмади. Ҳаттоки биринчи бўлимда рақибини нокдаун ҳолатига туширди. Якуний баҳолар — 5:0 (30:27, 30:27, 30:27, 30:27, 30:26).

Шу тариқа, финалга чиққан Ўзбекистон эркаклар терма жамоаси аъзолари сони беш нафарга етди. Аввалроқ Саиджамшид Жаъфаров, Лазизбек Мулложонов, Ҳасанбой Дўсматов ва Абдумалик Халаков финалга йўл олган, Шаҳзод Музаффаров, Адҳамжон Муҳиддинов ва Асадхўжа Мўйдинхўжаев ярим финалда енгилиб, бронза медалига эга чиққани хабар қилинганди.

10 ноябрь куни яна қуйидаги боксчилар ўз жангини ўтказади:

-80 кг: Одилжон Аслонов — Омурбек Бекжигит улуу (Қирғизистон) (22:00 дан сўнг)
-92 кг: Мадиёр Саидраҳимов — Аҳмат Сулайман (Иордания) (22:30 дан сўнг)