"Lokomotiv" - "Metallurg" o‘yinidan (3:1) so‘ng bekobodliklar ustozi Luisma Ernandes matbuot anjumanida jurnalistlarning savollariga javob qaytardi.

-  O‘yin haqida
-  Bugungi o‘yinga biz g‘alaba qozonishni maqsad qilib kelgandik. Va bu yutug‘imizni butun mavsum davomida bizni qo‘llab quvvatlab kelgan ashaddiy ishqibozlarimizga bag‘ishlamoqchi edik. Ammo o‘yinni boy berib qo‘ydik. Chempionatda yaxshiroq natija ko‘rsatib, yuqoriroq o‘rinlarni egallash uchun yil davomida qattiq mehnat qildik. Bugungi o‘yindan ko‘nglimiz to‘lmagan bo‘lsa-da, mavsumdagi ishtirokimizdan qoniqish hosil qildim. Bugungi g‘alaba bilan “Lokomotiv” jamoasini tabriklayman. Biz esa biroz dam olgach, keyingi mavsumga tayyorgsharlikni boshlaymiz.

-  Bugungi uchrashuvning natijasi “Metallurg” uchun unchalik ahamiyat kasb etmasdi. Bu futbolchilarni o‘yinga tayyorlashda qiyinchilik tug‘dirmaydimi?
-  Albatta bunday vaziyatda oson bo‘lmaydi. Ammo ta’kidlab o‘tganimdek yil davomida biz o‘zimiz tanlagan yo‘ldan og‘ishmay mehnat qildik. Bugun ham, bundan oldingi o‘yinda ham oxirigacha kurashdik. Ammo ikkala o‘yinda ham omadimiz chopmadi. Bugun “Lokomotiv”ga ochko juda zarur bo‘lganligi bois ular har bitta to‘p uchun oxirigacha kurashishdi va yakunda g‘alaba qozonishdi. Bugungi g‘alabaga ular loyiq edi, deyishim mumkin.

-  Mavsum avvalida jamoa oldiga qanday vazifa qo‘yilgandi. Uni qay darajada bajardingizlar? Agar bajarilmagan bo‘lsa murabbiylar shtabi iste’fo bermaydimi?
-  Bu yilgi chempionat juda murosasiz kechdi. Bizning natijalarimiz o‘tgan yilgiga nisbatan yaxshilandi. Bir muddat oldinroq musobaqa jadvalidagi mavqeimizni tinchroq hududga olib kelishga muvaffaq bo‘ldik. Qolish yoki ketishimga keladigan bo‘lsak keyingi mavsumda ham faoliyatimizni davom ettirishni rejalashtirganmiz.

-  Bugungi o‘yinga taalluqli bo‘lmagan savol bermoqchiman. “Metallurg”dan faoliyatingizni davom ettirmoqchi bo‘lsangiz, o‘zbek tilini o‘rganayapsizmi?
-  O‘zbek tilini mukammal o‘rganishni istayman. Hozircha muloqot uchun eng zarur so‘zlarni bilib oldim. O‘ylashimcha O‘zbekiston menga, men ham O‘zbekistonga yoqdim deb o‘ylayman.

-  Unda o‘zbek tilida bir ikkita so‘z aytib bering...
-  Rahmat, to‘p, kengroq...

-  Yana o‘yinga taalluqli bo‘lmagan savol. Mundial boshlanayapti, Ispaniya jahon chempioni bo‘ladimi?
-  Inshaalloh bo‘ladi. Umid qilaman bu safargi jahon chempionati juda yuqori saviyada o‘tadi. Mezbon mamlakatning tashkiliy ishlarini kuzatib shunday xulosaga keldim. Keyingi mavsumlarda yanada qattiq mehnat qilishimiz kerak, O‘zbekistonning ham Jahon chempionatidagi ishtirokini ta’minlashimiz uchun.

-  Matbuot anjumanida batafsil savollarga javob qaytarganingiz uchun rahmat.
-  Sizlarga ham rahmat. Ishlaringizda omad va muvaffaqiyat tilayman.