Ayni kunlarda Isroil davlatida shaxmat bo‘yicha FIDE jamoalar o‘rtasidagi jahon chempionati deyarli yakuniga yetdi.

O‘zbekiston terma jamoasi chempionlik uchun finalda Xitoyga qarshi dona surdi. Dastlabki partiyada biznikilardan faqat Shamsiddin Vohidov yutqazgan bo‘lsa, qolgan 3 shaxmatchimiz durang o‘ynadi. Natijada — 1,5 - 2,5.

Shamsiddin chorak finaldagi ikki mag‘lubiyatga qo‘shib hisoblaganda, ketma-ket 3ta o‘yinda yutqazgani uchun bo‘lsa kerak, murabbiylar ikkinchi partiyada uning o‘rniga Ortiq Nig‘matovni qo‘yishdi. Afsuski, Ortiq ham qora donalarda o‘ynab, raqibning bosimiga dosh bera olmadi va mag‘lub bo‘ldi. Sindarov va Jahongir Vohidov durang o‘ynagach, ikkinchi partiyani duranggacha olib borish vazifasi Nodirbek Yoqubboyevda qoldi. U g‘alabaga yaqin kelgandi, ammo uning raqibi Lu Shangley bahsni duranggacha olib bordi. Ikkinchi partiyada ham shunday mag‘lubiyat — 1,5 - 2,5.

Shu tariqa, Xitoy g‘oliblikni qo‘lga kiritgan bo‘lsa, o‘zbekistonlik yigitlar kumush bilan cheklanishdi.

Bronza medali Hindiston va Ispaniya terma jamoalari o‘rtasidagi dastlabki 2ta partiyada durang qayd etildi. Endi tomonlar tay-brekda tezkor o‘yinda ishtirok etishadi.