Portugaliyalik futbol agenti Paulu Barboza Portugaliya terma jamoasining Uruvay darvozasiga urgan birinchi goli dastlab Ronaldu hisobiga yozilib, keyin Fernandeshga yozilganiga o‘z munosabatini bildirdi.

Portugaliyaliklar golni Krishtianuga "olib" berishga harakat qilishgan bo‘lsa, FIFA to‘pga o‘rnatilgan chip ma’lumotlarini tekshirib ko‘rib, golni Bruno hisobida qoldirishga qaror qildi.

«Bu holat terma jamoa ichki muhitiga ta’sir ko‘rsatishi mumkin. Ronaldu bu ishi orqali shaxsiy manfaatini jamoanikidan ustun qo‘yishini ko‘rsatmoqda. FIFA esa to‘pda chip borligini, to‘p yo‘nalishini o‘zgarmaganini ta’kidladi.

Krishtianu nima uchun ushbu masalani ko‘tarayotgani tushunarsiz. Bu jamoada yomon muhitni yuzaga keltiradi. Portugaliyada esa barcha bu gol, shubhasiz,  Brunu Fernandeshga tegishli ekanini aytmoqda. Bu borada bahslashish kerak emas. Bu shunchaki chiroyli bo‘lmagan va noprofessional ish.

Portugaliya terma jamoasining o‘yiniga to‘xtaladigan bo‘lsam, g‘alaba bu g‘alaba. Ha, u qadar ishonchli emas. Terma jamoa bundan ham yaxshiroq o‘ynay olishi mumkin. Agar o‘z oldimizga yuqori maqsadlar qo‘ygan bo‘lsak, yaxshi o‘ynashimiz kerak. Keyin bahslarda yanada ishonchli o‘yin namoyish etamiz, deb umid qilaman», — dedi Barboza.