«Yuventus»ning sobiq prezidenti Jovanni Kobolli Turin klubidagi inqiroz haqida gapirdi. Uning aytishicha, «Yuve»ning sobiq rahbarlari (xususan, yaqinda «byankonerilar» prezidenti lavozimini tark etgan Andrea Anyelli) bir qator jiddiy xatolarga yo‘l qo‘ygan.

«Dastlab Anyellining kelishi ijobiy qabul qilindi. U juda yaxshi boshladi, lekin Ronalduning kelishi bilan hammasi o‘zgardi.

Marotta («Yuventus»ning sobiq bosh direktori) Ronaldu bilan shartnoma imzolashni istamadi, Anyelli va Paratichi (byankonerilarning sobiq sport direktori) shartnomani yakunlash zarurligini ta’kidladi, shu sababli Marotta oxir-oqibat bunga qo‘shildi.

Shubhasiz, Ronalduga sarmoya kiritish juda qimmatga tushdi. «Yuventus» juda ko‘p pul sarfladi va moliyaviy jihatdan o‘zini havas qilib bo‘lmaydigan ahvolga solib qo‘ydi. Shu sababli klub qo‘shimcha sarmoya jalb qilishga majbur bo‘ldi.

Bundan tashqari, Maurisio Sarrini bosh murabbiylikka taklif qilish va Superligani tashkil etishda ishtirok etish kabi boshqa xatolar ham bo‘lgan», — dedi Jovanni Kobolli Italiya matbuotiga bergan intervyusida.