Krishtianu Ronaldu Portugaliya terma jamoasi bosh murabbiyi Fernandu Santushdan norozi.

Correio De Manha xabariga ko‘ra, portugaliyalik hujumchi uni juda tez zaxiraga olyapti deb hisoblamoqda. Ronaldu jahon chempionatining barcha uch o‘yinida almashtirildi - Ganaga qarshi (3:2) 88-daqiqada, Urugvayga (2:0) - 82-da, Janubiy Koreyaga (1:2) - 65-da.

Qayd etilishicha, Santush har qanday bahsda doimo Ronalduning manfaatlarini himoya qiladi.

Portugaliya futbol federasiyasi (FPF) Ronalduning noroziligiga e’tibor qaratmoqchi emas. FPFdagi manba shunday dedi: “Jahon chempionati finaliga chiqishga uch o‘yin qoldi! Biz bor e’tiborimizni faqat o‘yinlarga qaratishimiz va bahs-munozaralarga sabab bo‘lmasligimiz kerak”.

Eslatib o‘tamiz, Ronaldu Janubiy Koreya bilan o‘yinda almashtirishga juda emosional tarzda munosabat bildirgandi. Translyasiya qilingan kadrlarda u Santushga nimadir deb baqirayotgani ko‘ringandi. O‘yindan so‘ng murabbiy ham, hujumchi ham Ronalduning emosional munosabatiga Janubiy Koreya terma jamoasi futbolchilaridan birining xatti-harakati sabab bo‘lganini aytishdi.