Криштиану Роналду Португалия терма жамоаси бош мураббийи Фернанду Сантушдан норози.

Correio De Manha хабарига кўра, португалиялик ҳужумчи уни жуда тез захирага оляпти деб ҳисобламоқда. Роналду жаҳон чемпионатининг барча уч ўйинида алмаштирилди - Ганага қарши (3:2) 88-дақиқада, Уругвайга (2:0) - 82-да, Жанубий Кореяга (1:2) - 65-да.

Қайд этилишича, Сантуш ҳар қандай баҳсда доимо Роналдунинг манфаатларини ҳимоя қилади.

Португалия футбол федерацияси (FPF) Роналдунинг норозилигига эътибор қаратмоқчи эмас. FPFдаги манба шундай деди: “Жаҳон чемпионати финалига чиқишга уч ўйин қолди! Биз бор эътиборимизни фақат ўйинларга қаратишимиз ва баҳс-мунозараларга сабаб бўлмаслигимиз керак”.

Эслатиб ўтамиз, Роналду Жанубий Корея билан ўйинда алмаштиришга жуда эмоционал тарзда муносабат билдирганди. Трансляция қилинган кадрларда у Сантушга нимадир деб бақираётгани кўринганди. Ўйиндан сўнг мураббий ҳам, ҳужумчи ҳам Роналдунинг эмоционал муносабатига Жанубий Корея терма жамоаси футболчиларидан бирининг хатти-ҳаракати сабаб бўлганини айтишди.