«Манчестер Юнайтед» ва «Аталанта» ярим ҳимоячи Эдерсоннинг трансфери бўйича келишувга эришиш арафасида. Инсайдер Фабрицио Романонинг хабар беришича, клублар ўртасидаги музокаралар муваффақиятли якунланишга жуда яқин. Энди барчаси «қизил иблислар»нинг ўзига боғлиқ – уларга битимни расмийлаштириш қолди, холос.
Жума куни Эдерсон А Серия сўнгги тури доирасидаги «Аталанта» ва «Фиорентина» ўртасидаги ўйинни (1:1) ўтказиб юборди. Бергамоликлар устози Раффаэле Палладино 26 ёшли ярим ҳимоячининг «Манчестер Юнайтед»га ўтиши борасидаги музокаралар сабаб уни майдонга туширмасликка қарор қилганини тан олди.
Эслатиб ўтамиз, бразилиялик футболчига «Арсенал», «Манчестер Сити», «Атлетико» ва бошқа нуфузли клублар ҳам қизиқиш билдирган эди.
