«Manchester Yunayted» va «Atalanta» yarim himoyachi Edersonning transferi bo‘yicha kelishuvga erishish arafasida. Insayder Fabrisio Romanoning xabar berishicha, klublar o‘rtasidagi muzokaralar muvaffaqiyatli yakunlanishga juda yaqin. Endi barchasi «qizil iblislar»ning o‘ziga bog‘liq – ularga bitimni rasmiylashtirish qoldi, xolos.
Juma kuni Ederson A Seriya so‘nggi turi doirasidagi «Atalanta» va «Fiorentina» o‘rtasidagi o‘yinni (1:1) o‘tkazib yubordi. Bergamoliklar ustozi Raffaele Palladino 26 yoshli yarim himoyachining «Manchester Yunayted»ga o‘tishi borasidagi muzokaralar sabab uni maydonga tushirmaslikka qaror qilganini tan oldi.
Eslatib o‘tamiz, braziliyalik futbolchiga «Arsenal», «Manchester Siti», «Atletiko» va boshqa nufuzli klublar ham qiziqish bildirgan edi.
