«Barselona» vingeri Lamin Yamal La Liga doirasida «Espanyol»ga qarshi kechgan va 4:1 hisobidagi g‘alaba bilan yakunlangan o‘yindan so‘ng ijtimoiy tarmoqlardagi sahifasiga yangi post joylashtirdi. Uchrashuvning 9 va 25-daqiqalarida Ferran Torres raqib darvozasini ishg‘ol qildi — har ikkala golga Yamal assistentlik qildi.

87-daqiqada 18 yoshli futbolchining o‘zi ham gol urishga muvaffaq bo‘ldi, 89-daqiqada esa Markus Reshford tablodagi yakuniy hisobni o‘rnatdi.

«Barselona — ko‘k-anorrang! Ular buni doimgidek hazm qilishlariga to‘g‘ri keladi», — deb yozdi Barselona derbisining eng yaxshi futbolchisi deb topilgan Yamal o‘z ijtimoiy tarmoqlarida.

Xans-Diter Flik shogirdlari 79 ochko bilan turnir jadvalida peshqadamlik qilmoqda va Madridning «Real» klubini 9 ochkoga ortda qoldirmoqda. «Espanyol» (38 ochko) esa 10-o‘rinda bormoqda.