Lionel Messini oldinda yakshanba kungi bo‘ladigan o‘ta muhim o‘yin kutib turibdi. Argentina va Fransiya to‘qnashuvi afsonaviy futbolchining so‘nggi 15 yildagi ikkinchi finali bo‘ladi. U oldinroq, ushbu final o‘zi uchun so‘nggisi bo‘lishini ochiq tan olgandi. Garchand Messi va uning finaldagi raqibi bo‘lgan Mbappe yoshlari orasida 12 yillik farq bo‘lsada, Jahon chempionatidagi statistika borasida bu nomlarni unchalik katta masofa ajratmaydi. Quyida shu haqida so‘z boradi.

Mbappening natijalari hali oshadi. Ammo Messi o‘z faoliyatidagi beshinchi Jahon chempionatini o‘tkazmoqda. Garchanda Messidan 12 ta kam o‘yin o‘tkazgan bo‘lsada, mundialdagi Mbappe va Messi urgan gollar orasidagi farq juda kichik, 2 tani tashkil qiladi. Ya’ni, Messi bor-yo‘g‘i ikkita gol bilan ustunlikka ega. Bu juftlikning qarama-qarshiligida o‘ziga xoslik mavjud. Xususan, ular bundan to‘rt yil oldin nimchorak finalda to‘qnash kelgan. O‘sha o‘yinda Mbappe dubl qayd etgan. Hisob 4-3 bilan fransuzlar foydasiga hal bo‘lgan. Ayni damda "PSJ"dagi klubdoshlar Qatardagi turnirda beshtadan gol urib, to‘purarlik poygasida faol bo‘lib turibdi.
Messining Jahon chempionatlaridagi statistikasi 25 ta o‘yinda 11 ta golga teng. Mbappeniki esa 13 ta bahsda 9 ta goldan iborat.

Futbolchilarning gollarini o‘rtacha oladigan bo‘lsak, Messi har 199 daqiqada bitta gol urgan bo‘ladi. Mbappe esa bu ishni har 112 daqiqada bajargan. Ammo ular o‘rtasida, assistlar borasida katta farq bor. Albatta, Messi bu ishning ustasi. U jami 8 marta assistentlik qilgan. Mbappeda bu ko‘rsatkich 2 taga teng. Shuni ham yoddan chiqarmaslik kerakki, Mbappe hech qachon JCH bahslarini boshi egik holda tark etmagan. Messida esa bu holat 15 yildan beri qaytalanadi. Argentina oxirgi marta finalga 2014 yilda yetib kelgan va Germaniyaga mag‘lub bo‘lgan. Hozir esa Messiga ikkinchi imkon berildi. Bundan foydalanish esa futbolchining o‘ziga bog‘liq.

Kilian Mbappe Fransiya terma jamoasi libosida finaldagi mag‘lubiyat nima ekanini deyarli bilmaydi. U bir marta chempion bo‘lgan. Yakshanba kuni esa buni ikkitaga yetkazishi mumkin bo‘ladi. Ammo bir narsa aniq, Messi va Mbappe o‘rtasidagi eng muhim natija borasida 23 yoshli futbolchi ustun – u allaqachon Jahon chempioni.

Eslatib o‘tamiz, Argentina va Fransiya o‘rtasidagi final bahsi 18 dekabr kuni, O‘zbekiston vaqti bilan 20:00da start oladi. Bahsni SPORT TV telekanali orqali tomosha qilishingiz mumkin bo‘ladi.

ISMATOV J.