Ayni kunlarda Halqaro futbol kuni munosabati bilan Respublikamizning barcha hududlarida futbol festivallari bo‘lib o‘tmoqda. Poytaxtimizda joylashgan 102-umumta’lim maktabida ham bayram tadbirlari o‘tkazildi. Festival davomida maktab o‘quvchilari O‘zbekiston milliy va futzal terma jamoalari futbolchilari bilan birgalikda mahorat darslarida ishtirok etishdi. Tadbirning ikkinchi qismida O‘zbekiston Xalq ta’limi vazirligi hamda O‘zbekiston futbol assosiasiyasi rahbariyati o‘rtasida uchrashuv tashkil etildi.

Unda yurtimizda futbolni rivojlantirish va ommalashtirish, avvalo, maktablardan boshlanishi ta’kidlandi. Xalq ta’limi vaziri Baxtiyor Saidov endilikda maktablarda futbol ta’limini yaxshilash, o‘quvchilar o‘rtasidagi musobaqalarni ko‘paytirish va ular orasidan iste’dodlilarini aniqlashga qaratilgan aniq vazifalar belgilab olinishini aytib o‘tdi.

O‘z o‘rnida O‘FA birinchi vitse-prezidenti Ravshan Irmatov hamkorlik uchun minnatdorchilik bildirib, FIFA, Xalq ta’limi vazirligi va O‘FA o‘rtasidagi “Maktabda futbol” loyihasi kelajakda yosh futbolchilarni kashf qilishiga xizmat qilishini aytib, maktab o‘quvchilari orasidan professional futbolchilar yetishib chiqishiga ishonch bildirdi.

“Futbol bolalarimizni sog‘lom bo‘lib voyaga yetishlariga ko‘maklashishdan tashqari, ularda jamoa bilan birgalikda ishlash, yetakchilik va tezkor fikrlash kabi sifatlarini rivojlantirishga xizmat qiladi”, dedi Ravshan Irmatov.

Uchrashuvda Xalq ta’limi vazirligi va O‘FA o‘rtasida o‘zaro hamkorlikni yo‘lga qo‘yish to‘g‘risida Memorandum imzolandi. Unga ko‘ra, ommaviy futbolni rivojlantirish, maktablarda o‘g‘il-qizlar o‘rtasida musobaqalarni tizimli o‘tkazib borish, futbol infratuzilmasiga ega Respublikamizning barcha hududlaridagi maktablarda futbol darslarini tashkil etish hamda jismoniy tarbiya o‘qituvchilarini O‘FA tomonidan “C” lisenziyasi bo‘yicha murabbiylikka o‘qitish ko‘zda tutilgan.

Uchrashuv yakunida maktab o‘quvchilariga O‘zbekiston futbol assosiasiyasining esdalik sovg‘alari topshirildi.