Айни кунларда Ҳалқаро футбол куни муносабати билан Республикамизнинг барча ҳудудларида футбол фестиваллари бўлиб ўтмоқда. Пойтахтимизда жойлашган 102-умумтаълим мактабида ҳам байрам тадбирлари ўтказилди. Фестивал давомида мактаб ўқувчилари Ўзбекистон миллий ва футзал терма жамоалари футболчилари билан биргаликда маҳорат дарсларида иштирок этишди. Тадбирнинг иккинчи қисмида Ўзбекистон Халқ таълими вазирлиги ҳамда Ўзбекистон футбол ассоциацияси раҳбарияти ўртасида учрашув ташкил этилди.

Унда юртимизда футболни ривожлантириш ва оммалаштириш, аввало, мактаблардан бошланиши таъкидланди. Халқ таълими вазири Бахтиёр Саидов эндиликда мактабларда футбол таълимини яхшилаш, ўқувчилар ўртасидаги мусобақаларни кўпайтириш ва улар орасидан истеъдодлиларини аниқлашга қаратилган аниқ вазифалар белгилаб олинишини айтиб ўтди.

Ўз ўрнида ЎФА биринчи витсе-президенти Равшан Ирматов ҳамкорлик учун миннатдорчилик билдириб, ФИФА, Халқ таълими вазирлиги ва ЎФА ўртасидаги “Мактабда футбол” лойиҳаси келажакда ёш футболчиларни кашф қилишига хизмат қилишини айтиб, мактаб ўқувчилари орасидан профессионал футболчилар етишиб чиқишига ишонч билдирди.

“Футбол болаларимизни соғлом бўлиб вояга етишларига кўмаклашишдан ташқари, уларда жамоа билан биргаликда ишлаш, етакчилик ва тезкор фикрлаш каби сифатларини ривожлантиришга хизмат қилади”, деди Равшан Ирматов.

Учрашувда Халқ таълими вазирлиги ва ЎФА ўртасида ўзаро ҳамкорликни йўлга қўйиш тўғрисида Меморандум имзоланди. Унга кўра, оммавий футболни ривожлантириш, мактабларда ўғил-қизлар ўртасида мусобақаларни тизимли ўтказиб бориш, футбол инфратузилмасига эга Республикамизнинг барча ҳудудларидаги мактабларда футбол дарсларини ташкил этиш ҳамда жисмоний тарбия ўқитувчиларини ЎФА томонидан “C” лицензияси бўйича мураббийликка ўқитиш кўзда тутилган.

Учрашув якунида мактаб ўқувчиларига Ўзбекистон футбол ассоциациясининг эсдалик совғалари топширилди.