FIFA Jahon Chempionatida qatnashadigan klublar uchun imtiyoz tariqasida 209 million dollar ajratadi, deya xabar qilmoqda The Times.

Har bir klub turnirda ishtirok etayotgan futbolchilarining soniga va ularning muvaffaqiyatiga qarab pul oladi. Taqsimotda barcha o‘yinchilar maydonga tushgan yo tushmaganidan qat’i nazar hisobga olinadi. Biroq futbolchi klubda ikki yildan kam vaqt o‘tkazgan bo‘lsa, to‘lovning bir qismi avvalgi klubiga to‘lab beriladi.

Eng katta to‘lovni «Manchester Siti» oladi. «Shaharliklar»ga JCH-2022'da ishtirok etgan 16 futbolchisi uchun 5,6 million dollar to‘lanadi.

«Barselona» 4,1 million dollar oladi — 2022 yilgi mundialda klubning 17 nafar futbolchisi ishtirok etdi, ularning 8 nafari 1/8 finalda musobaqani tark etgan Ispaniya terma jamoasi sharafini himoya qilgandi. Mazkur 17 futbolchidan tashqari jamoani tark etgan yana yetti nafar o‘yinchi ham jamoaga daromad keltirgan (Messi — 120 ming, Grizmann — 150 ming dollar).

Turnirda 13 nafar futbolchisi qatnashgan «Manchester Yunayted» esa 3,62 million dollarga ega bo‘ladi.

«Chelsi» 12 nafar o‘yinchisi uchun 3,05 million, «Tottenhem» 11 futbolchi uchun 2,88 million, «Arsenal» — 2,61 million (10 futbolchi), «Liverpul» — 1,92 million dollar (7 futbolchi) oladigan bo‘ldi.

APLdan «Bornmut», «Kristal Pelas» va «Sauthempton» jamoalariga eng kam to‘lovlar amalga oshiriladi. Ularning har biri 360 ming dollardan pul miqdoriga ega bo‘ladi.