ФИФА Жаҳон Чемпионатида қатнашадиган клублар учун имтиёз тариқасида 209 миллион доллар ажратади, дея хабар қилмоқда The Times.

Ҳар бир клуб турнирда иштирок этаётган футболчиларининг сонига ва уларнинг муваффақиятига қараб пул олади. Тақсимотда барча ўйинчилар майдонга тушган ё тушмаганидан қатъи назар ҳисобга олинади. Бироқ футболчи клубда икки йилдан кам вақт ўтказган бўлса, тўловнинг бир қисми аввалги клубига тўлаб берилади.

Энг катта тўловни «Манчестер Сити» олади. «Шаҳарликлар»га ЖЧ-2022'да иштирок этган 16 футболчиси учун 5,6 миллион доллар тўланади.

«Барселона» 4,1 миллион доллар олади — 2022 йилги мундиалда клубнинг 17 нафар футболчиси иштирок этди, уларнинг 8 нафари 1/8 финалда мусобақани тарк этган Испания терма жамоаси шарафини ҳимоя қилганди. Мазкур 17 футболчидан ташқари жамоани тарк этган яна етти нафар ўйинчи ҳам жамоага даромад келтирган (Месси — 120 минг, Гризманн — 150 минг доллар).

Турнирда 13 нафар футболчиси қатнашган «Манчестер Юнайтед» эса 3,62 миллион долларга эга бўлади.

«Челси» 12 нафар ўйинчиси учун 3,05 миллион, «Тоттенҳэм» 11 футболчи учун 2,88 миллион, «Арсенал» — 2,61 миллион (10 футболчи), «Ливерпуль» — 1,92 миллион доллар (7 футболчи) оладиган бўлди.

АПЛдан «Борнмут», «Кристал Пэлас» ва «Саутҳэмптон» жамоаларига энг кам тўловлар амалга оширилади. Уларнинг ҳар бири 360 минг доллардан пул миқдорига эга бўлади.