Dekabr oyining so‘nggi haftasida Bekobodning “Metallurg” jamoasi keyingi mavsum uchun ilk tayyorgarlik yig‘inini boshlaydi. O‘tgan yilgi tarkib o‘zagini saqlab qolgan jamoa mashg‘ulotlarini mahalliy murabbiylar olib borishadi. Jamoa bosh murabbiyi ispaniyalik Luisma Ernandes esa Yangi yil bayramidan so‘ng Bekobodga yetib kelishi va yig‘inga boshchilik qilishi kutilmoqda.

Ayni paytga kelib klubni tark etgan futbolchilar ham bor. Jumladan, “Metallurg” himoyachi Abbos Otaxonov, hujumchilar Jasur Xolto‘rayev hamda Boburbek Farhodovlar bilan xayrlashdi.

Yangi mavsum arafasida jamoa tarkibida bir qator yangi futbolchilar paydo bo‘lishi kutilmoqda. Hozircha muzokaralar davom etmoqda. “Metallurg” safiga kelib qo‘shiladigan o‘yinchilar haqida yig‘in boshlangandan keyin qo‘shimcha ma’lumot beramiz.

Yana bir ma’lumot, jamoaning iqtidorli yoshlaridan Humoyunshoh Sayyotov hamda Shahzodjon Ne’matjonovlar shu kunlarda poytaxtimizdagi “Chig‘atoy” sport majmuasida O‘zbekiston U-20 terma jamoasining yig‘inida qatnashishyapti.