"Yuventus" darvozaboni Voysex Shesni "Standard" bilan o‘rtoqlik uchrashuvida (1:1) jarohat oldi.

Football Italia xabariga ko‘ra, o‘yin davomida polshalik bo‘ynidagi muammo tufayli uning o‘rniga futbolchi maydonga tushishini so‘ragan. Hozircha jarohatning qay darajada jiddiyligi noma’lum.

"Yuventus"ning JCH-2022dagi tanaffusdan keyingi birinchi rasmiy o‘yini 4 yanvar kuni "Kremoneze" bilan bo‘lib o‘tadi. Italiya A Seriyasi turnir jadvalida jamoa 15 uchrashuvda 31 ochko jamg‘arib, uchinchi o‘rinni egallab turibdi.

Shesni joriy mavsumda “Yuventus” safida barcha turnirlarda 13 ta o‘yin o‘tkazib, 12 ta gol o‘tkazib yubordi va 7 ta o‘yinda darvozasi dahlsizligini saqlab qoldi.