"PSJ" va Argentina terma jamoasi hujumchisi Lionel Messi L'Equipe nashri tomonidan 2022 yilning eng yaxshi sportchisi deb topildi. Ikkinchi o‘rin fransiyalik hujumchi Kilian Mbappega nasib etdi.
35 yoshli argentinalik 808 ochko, 24 yoshli fransiyalik 381 ochko jamg‘argan. Uchinchi pog‘onadagi ispaniyalik tennischi Rafael Nadal 285 ball to‘plagan.
2022 yilning eng yaxshi 10 nafar sportchisi:
1. Lionel Messi (futbol, 808 ochko)
2. Kilian Mbappe (futbol, 381)
3. Rafael Nadal (tennis, 285)
4. Remko Evenepul (velosiped, 252)
5. Maks Ferstappen (Formula 1, 196)
6. Karim Benzema (futbol, 195)
7. Armand Dyuplantis (engil atletika, 185)
8. Stiven Karri (basketbol, 139)
9. Antuan Dyupon (regbi, 105)
10. David Popovich (suzish, 98 yosh)
2022 yilda Messi PSJ va Argentina terma jamoasi safida 47 ta o‘yinda maydonga tushib, 25 ta gol urdi va 29 ta golli uzatmani amalga oshirdi. U jahon chempioni bo‘ldi, Finalissima, Fransiya Superkubogi va chempionatni qo‘lga kiritdi. Qatardagi jahon chempionatida u 7 ta gol urib, 3 ta golli uzatmani amalga oshirib, turnirning eng yaxshi futbolchisi deb topildi.
2022 yilda Mbappe PSJ va Fransiya terma jamoasi safida 54 ta o‘yinda maydonga tushib, 53 ta gol urdi va 19 ta golli uzatmani amalga oshirdi. Parij klubi bilan u Liga 1da g‘olib chiqdi. Milliy terma jamoa bilan 2022 yilgi jahon chempionatida ikkinchi o‘rinni egallab, turnirning eng yaxshi to‘purariga aylandi (8 gol).
Dunyoning eng yaxshi sportchisi uchun mukofot L'Equipe tomonidan 1975 yildan beri berilib keladi.
