"Inter" A seriyada "Monsa" ustidan g‘alaba qozona olmadi.

Uchrashuv 2:2 hisobida yakunlandi. Neradzurrilar 93-daqiqagacha oldinda bo‘lishdi, ammo yakunda gol o‘tkazib yuborishdi va ikki ochko yo‘qotishdi.

Hakam Franchesko Acherbining ko‘plab bahs-munozaralarga sabab bo‘lgan golini hisobga olmadi va "Inter" murabbiyi Simone Indzagi vaziyatni quyidagicha izohladi: "Juda jahlim chiqdi, chunki yaqqol xato hamma narsani hal qildi. VAR besh yildan beri qo‘llanilmoqda, ammo bunday holatlar hamon uchrab turadi.

Takroriy vaziyatda "Monsa" futbolchisi sherigi bilan to‘qnashib ketgani aniq bo‘ldi, shuning uchun gol hisoblanishi kerak edi, ammo hakam VAR yordamiga murojaat qilmadi, chunki u o‘yinni muddatidan oldin to‘xtatdi", - deya shikoyat qildi murabbiy.