“Renn” darvozaboni Stiv Mandanda Fransiya termasidagi faoliyatini yakunladi. Bu haqda Fransiyaning L'Equipe nashri xabar berdi.

Manba bergan xabarga ko‘ra, 37 yoshli fransiyalik darvozabon 2022 yilgi JCH-2022 finalida Argentinaga (3:3, 2:4 pen.) qarshi Qatarda bo‘lib o‘tgan final uchrashuvidan so‘ng terma jamoadagi faoliyatini yakunlashga qaror qilgan.

Mandanda Fransiya terma jamoasida 2008 yilda debyut qilgan. Darvozabon terma jamoa safida jami 35 ta o‘yin o‘tkazib, o‘z darvozasidan 32 ta gol o‘tkazib yuborgan va 14 marta o‘z darvozasi daxlsizligini ta’minlagan. Jahon chempionatlarida Mandanda ikkita o‘yin o‘tkazdi: 2018 yilda Rossiyada Daniyaga qarshi (0:0) va 2022 yilda Qatarda Tunisga qarshi (0:1). Darvozabon 2018 yilda jahon chempionati va 2021 yilda Millatlar ligasida g‘olib chiqqan.

Eslatib o‘tamiz, darvozabon Ugo Lyoris ham avvalroq Fransiya terma jamoasidagi faoliyatini yakunlaganini ma’lum qilgandi.