“Ренн” дарвозабони Стив Манданда Франция термасидаги фаолиятини якунлади. Бу ҳақда Франциянинг L'Equipe нашри хабар берди.

Манба берган хабарга кўра, 37 ёшли франциялик дарвозабон 2022 йилги ЖЧ-2022 финалида Аргентинага (3:3, 2:4 пен.) қарши Қатарда бўлиб ўтган финал учрашувидан сўнг терма жамоадаги фаолиятини якунлашга қарор қилган.

Манданда Франция терма жамоасида 2008 йилда дебют қилган. Дарвозабон терма жамоа сафида жами 35 та ўйин ўтказиб, ўз дарвозасидан 32 та гол ўтказиб юборган ва 14 марта ўз дарвозаси дахлсизлигини таъминлаган. Жаҳон чемпионатларида Манданда иккита ўйин ўтказди: 2018 йилда Россияда Данияга қарши (0:0) ва 2022 йилда Қатарда Тунисга қарши (0:1). Дарвозабон 2018 йилда жаҳон чемпионати ва 2021 йилда Миллатлар лигасида ғолиб чиққан.

Эслатиб ўтамиз, дарвозабон Уго Льорис ҳам аввалроқ Франция терма жамоасидаги фаолиятини якунлаганини маълум қилганди.