Kecha Yoshlar siyosati va sport vaziri Adkham Ikramov O‘zbekistonda ommaviy va professional futbolni har tomonlama rivojlantirishning qo‘shimcha chora-tadbirlari to‘g‘risidagi taqdimot bilan tanishdi.

Taqdimotda O‘zbekiston Milliy Olimpiya qo‘mitasi bosh kotibi O.Kasimov, O‘zbekiston futbol assosiasiyasi birinchi vise-prezidenti R.Ermatov hamda Yoshlar siyosati va sport vazirligi mutaxassislari ishtirok etishdi.

Taqdimotda kelgusida mamlakatimizda ommaviy va professional futbolni rivojlantirish maqsadida aholi, ayniqsa yoshlar o‘rtasida futbolni yanada ommalashtirishga qaratilgan FIFAning maxsus dasturlarini amalga oshirish, sifatli sport zaxirasini yaratish, iqtidorli futbolchilarni aniqlash, tanlash va saralash (seleksiya)ning raqamlashtirilgan tizimini joriy qilish, futbol infratuzilmasini moddiy-texnik jihatdan yanada yaxshilash hamda xalqaro talablarga moslashtirish, ayollar o‘rtasida futbolni rivojlantirish, bu borada uzoq yillarga mo‘ljallangan istiqbolli rejalarni ishlab chiqish va amalga oshirish, futbol bo‘yicha malakali trenerlar, hakamlar va mutaxassislarni tayyorlash, ularning malakasini oshirish va qayta tayyorlash tizimini yanada takomillashtirish, o‘quv-uslubiy qo‘llanmalar ishlab chiqish kabi masalalar muhokama qilindi.

Shuningdek, taqdimotda ilgari surilgan tashabbuslarga qo‘shimcha ravishda vazir Adkham Ikramov hamda mutaxassislar tomonidan bir qator takliflar bildirilib, rejalashtirilgan ishlarni amalga oshirishni jadallashtirish va to‘liq nazorat qilish zarurligi ta’kidlandi.