«Liverpul» futbolchilarining «Enfild» tribunasidan arqon yordamida 30 metr pastga tushishlariga to‘g‘ri keldi.
O‘zi nimalar bo‘lyapti? Nahotki, bu Yurgen Kloppning tartib-intizomni kuchaytirish yo‘lidagi yangi chorasi? Yo‘q, unday emas... Shunchaki, Xarvi Elliott, Diogu Jota va Kelvin Remzi «qizillar» faxri - «Enfild»da yo‘lga qo‘yilgan o‘ta qiziqarli yangi attraksion tashviqotida qatnashishdi.
Yangi ko‘ngilochar attraksionga jarangdor nom berildi - «Enfild»dan sho‘ng‘ish». Xullas, Xarvi Elliott, Diogu Jota va Kelvin Remzi o‘tkir hissiyotlar junbushini xohlovchi jamoa muxlislarini stadionning 21000 kishiga mo‘ljallangan bosh tribunasi chetidan (balandligi 100 fut, chamasi 30 metr) arqon yordamida pastga sho‘ng‘ib ko‘rishga chorlashdi. Ularga LFC guruhi vakillari ham qo‘shilib, qiziqarli ko‘ngilochar o‘yinning dastlabki ishtirokchilariga aylanishdi. Bu attraksion «Enfild» stadionini butunlay boshqa rakursdan ko‘rish imkonini berishi bilan ko‘pchilikni qiziqtirishi mumkin.
Attraksion maxsus zina orqali asosiy tribuna tom qismiga ko‘tarilishdan boshlanadi. Gap Mersisaydning eng baland nuqtalaridan biri haqida ketmoqda. Qisqasi, o‘yin ishtirokchilari nafaqat «Enfild» go‘zalligidan bahra olishadi, balki butun shaharning ajoyib manzarasi, diqqatga sazovor joylarini yuqoridan tomosha qilishlari mumkin. Har bir ishtirokchi asosiy tribuna tomiga chiqishdan oldin himoya vositalari bilan to‘liq ta’minlanadi, sho‘ng‘ish jarayonida esa klubning rasmiy ramziga teginish imkoni bor. Ushbu ko‘ngilxushlikning bahosi - 45 funt sterling. 10-17 yoshli o‘smirlarga esa chipta bahosi biroz pastroq - 38 funt.
D.ALIMOV tayyorladi
