"Brayton" yarim himoyachisi Moyses Kaysedo ushbu transfer oynasida klubni tark etishini tasdiqladi.

“Men janob Blum va "Brayton"dan menga Premyer-ligaga o‘tish imkoniyatini bergani uchun minnatdorman va ular uchun doim qo‘limdan kelganini qilganimni his qilyapman. Men doim tabassum va yurak bilan futbol o‘ynayman.

Men Ekvadorning Santa-Domingo shahrida kambag‘al bo‘lib o‘sgan 10 nafar bolaning eng kichigiman. Men doim Ekvador tarixidagi eng sovrindor futbolchi bo‘lishni orzu qilganman. Men "Brayton"ga rekord darajadagi transfer narxini qo‘lga kiritishda yordam bera olganimdan faxrlanaman, bu ularga uni qayta investisiya qilish va klubning muvaffaqiyatini davom ettirishga yordam beradi.

Muxlislar meni o‘z qalblarida qabul qilishdi va ular doim qalbimda bo‘lishadi, shuning uchun ular bu ajoyib imkoniyatdan nega foydalanmoqchi ekanligimni tushunishadi deb umid qilaman”, — deb yozadi Kaysedo ijtimoiy tarmoqda.

Avvalroq "Arsenal" 21 yoshli futbolchi uchun 60 million funt taklif qilgani haqida xabar berilgandi. Unga "Chelsi" ham da’vo qilmoqda, ammo "chag‘alaylar" "ko‘klar"ning 55 million funtlik taklifini rad etishdi.

Ekvadorlik futbolchi joriy mavsumda “Brayton” safida 21 ta o‘yinda maydonga tushib, 1 ta gol urdi va 1 ta golli uzatmani amalga oshirdi. Uning klub bilan shartnomasi 2025 yilning yoziga qadar mo‘ljallangan.