"Брайтон" ярим ҳимоячиси Мойсес Кайседо ушбу трансфер ойнасида клубни тарк этишини тасдиқлади.
“Мен жаноб Блум ва "Брайтон"дан менга Премьер-лигага ўтиш имкониятини бергани учун миннатдорман ва улар учун доим қўлимдан келганини қилганимни ҳис қиляпман. Мен доим табассум ва юрак билан футбол ўйнайман.
Мен Эквадорнинг Санта-Доминго шаҳрида камбағал бўлиб ўсган 10 нафар боланинг энг кичигиман. Мен доим Эквадор тарихидаги энг совриндор футболчи бўлишни орзу қилганман. Мен "Брайтон"га рекорд даражадаги трансфер нархини қўлга киритишда ёрдам бера олганимдан фахрланаман, бу уларга уни қайта инвестиция қилиш ва клубнинг муваффақиятини давом эттиришга ёрдам беради.
Мухлислар мени ўз қалбларида қабул қилишди ва улар доим қалбимда бўлишади, шунинг учун улар бу ажойиб имкониятдан нега фойдаланмоқчи эканлигимни тушунишади деб умид қиламан”, — деб ёзади Кайседо ижтимоий тармоқда.
Аввалроқ "Арсенал" 21 ёшли футболчи учун 60 миллион фунт таклиф қилгани ҳақида хабар берилганди. Унга "Челси" ҳам даъво қилмоқда, аммо "чағалайлар" "кўклар"нинг 55 миллион фунтлик таклифини рад этишди.
Эквадорлик футболчи жорий мавсумда “Брайтон” сафида 21 та ўйинда майдонга тушиб, 1 та гол урди ва 1 та голли узатмани амалга оширди. Унинг клуб билан шартномаси 2025 йилнинг ёзига қадар мўлжалланган.
