Мадриднинг "Реал" клуби яқин тарихдаги энг кенг кўламли таркиб тозалашини амалга оширишга тайёргарлик кўрмоқда. Айни пайтда Лиссабоннинг "Бенфика" клубини бошқараётган Жозе Моуриньо "қироллик клуби" бошқарувига қайтишга яқин турибди. Бу ҳақда Испаниянинг нуфузли Marca нашри хабар бермоқда.
Манбанинг таъкидлашича, португалиялик мутахассис жамоани ўз тактик концепциясига мослаштириш мақсадида 10 нафаргача футболчини сотиб юборишга тайёр. Янги лойиҳада футболчиларнинг обрўси ёки ўтмишдаги ютуқлари эмас, балки интизом ва психологик барқарорлик асосий мезон этиб белгиланади.
Винисиус ҳам дахлсиз эмас
Хабарда айтилишича, Моуриньонинг қайтиши ортидан ҳеч бир юлдузнинг жамоадаги ўрни кафолатланмайди. Ҳатто клуб етакчиси Винисиус Жуниор ҳам трансферга қўйилиши мумкин.
Айни пайтда мадридликлар сафида келажаги сўроқ остида турган футболчилар рўйхати шаклланган:
-
Винисиус Жуниор
-
Эдуардо Камавинга
-
Ферлан Менди
-
Андрей Лунин
-
Даниэль Себальос
-
Гонсало Гарсия
Шунингдек, Жозе Моуриньо яримҳимоячилар Федерико Вальверде ва Орельен Тчуаменининг ҳам жамоадаги келажаги бўйича якуний қарор қабул қилиши кутилмоқда.
Инсайдерларнинг фикрича, бу қадамлар Моуриньонинг ҳимоядаги қатъий интизом ва тактик жиҳатдан ишончли футболчиларга устунлик бериши билан боғлиқ. Агар ушбу тайинлов амалга ошса, "Реал Мадрид" бутунлай бошқача қиёфадаги, янада тартибли жамоага айланади.
