«Бенфика» мураббийи Жозе Моуриньонинг Берлиндаги Олимпия стадионида «Бавария» ва «Штутгарт» жамоалари ўртасидаги Германия Кубоги финалида пайдо бўлиши кўплаб муҳокамаларга сабаб бўлган эди. Учрашув мюнхенликларнинг 3:0 ҳисобидаги ғалабаси билан якунланди, учта голни ҳам Харри Кейн киритди.
Моуриньонинг стадионда кўриниш бериши турли миш-мишларни келтириб чиқарди. Хусусан, «Реал Мадрид»га тайинланиши кутилаётган мураббий Майкл Олисени кузатиш учун келгани ҳақида тахминлар пайдо бўлди. Франциялик вингер жорий мавсум «Бавария»нинг асосий юлдузларидан бирига айланди ва хабарларга кўра, мадридликлар раҳбариятига маъқул келган.
Бироқ, Marca нашрининг маълум қилишича, Моуриньонинг Германия Кубоги финалига ташрифи на Олисе, на умуман трансферлар билан боғлиқ эмас.
Аниқланишича:
-
Португалиялик мураббий ўз ҳомийси бўлган Adidas таклифига биноан келган.
-
Сафар ўйиндан бир неча кун олдин режалаштирилган.
-
«Бавария» футболчилари бўйича ҳеч қандай учрашув ёки музокаралар бўлмаган.
