«Барселона» трансфер ойнаси ёпилгунига қадар беш нафар футболчиси билан хайрлашиши мумкин.
Журналист Хосе Альвареснинг маълум қилишича, гап Френки де Йонг, Марк Касадо, Эктор Форт, Алехандро Бальде ва Жюль Кунде ҳақида кетмоқда. Уларнинг барчасига бошқа клублардан қизиқиш мавжуд ва беш футболчи ҳам жорий ёзда жамоасини ўзгартириши мумкин.
Сўнгги вақтларда де Йонгга «Манчестер Сити» қизиқиш билдираётгани ҳақида хабарлар тарқалди. Касадони Саудия Арабистони клублари билан боғлашмоқда. Форт учун «Реал Сосьедад» ва Дортмунднинг «Боруссия»си даъвогарлик қилмоқда.
Бальдега «Манчестер Юнайтед» қизиқиш билдирмоқда, Кунде эса Англия Премьер-лигасининг бир қатор клублари назарида турибди.
Эслатиб ўтамиз, «Барселона» Ла Лигадаги янги мавсумни «Эльче» устидан 5:0 ҳисобидаги йирик ғалаба билан бошлади.
