Лондоннинг «Арсенал» клуби ҳужум чизиғини икки нафар ёш футболчи билан кучайтиришни режалаштирмоқда. Бу ҳақда Football London хабар берди.

Манба маълумотига кўра, «канонирлар» «Борнмут»нинг 20 ёшли ҳужумчиси Эли Жуниор Крупи ва «Брентфорд»нинг 24 ёшли вингери Кевин Шадени сотиб олишга қизиқиш билдирмоқда.

Аввалроқ журналист Дэвид Орнштейн «Борнмут» ўз футболчисини 115 миллион евро эвазига қўйиб юборишга тайёр эканини маълум қилган эди.

Шаде масаласида эса Football Transfers маълумотига кўра, «Брентфорд» уни фақат клуб тарихидаги рекорд сумма эвазига сотишга рози бўлади. Бунинг учун «Арсенал» 75 миллион евродан кўпроқ тўлашига тўғри келиши мумкин.

Шу тариқа, икки футболчининг эҳтимолий трансфери Лондон клубига жами 190 миллион евродан ортиққа тушиши мумкин.

Жорий мавсумда Кевин Шаде барча мусобақаларда 6 та ўйинда майдонга тушиб, 3 та гол урди. Крупи эса ҳозирча майдонга тушмади.