Poytaxtimizda o‘tkazilgan «CAFA Womenʼs Futsal Championship 2023» musobaqasi yakuniga yetdi. So‘nggi turda g‘oliblik uchun O‘zbekiston va Eron ayollar terma jamoalari maydonga chiqishdi.

Qizlarimiz 4-daqiqadayoq hisobni ochishga muvaffaq bo‘lishdi. Eronliklar esa tanaffusga qadar 3ta gol urib, oldinga o‘tib olishdi.

O‘zbekistonliklar ikkinchi bo‘limni juda kuchli boshlashdi va bahsning 33-daqiqasiga qadar 3ta gol urib, 4:3 hisobida oldiga o‘tib olishdi.

Uchrashuvda ikkita gol muallifiga aylangan Lyudmila Karachik so‘nggi daqiqalarda 2ta xatoga yo‘l qo‘yishi oqibatida terma jamoamiz o‘z darvozasidan 2 ta to‘p olib chiqishdi.

Vakillarimiz so‘nggi 2 daqiqani o‘ynovchi-darvozabon bila o‘tkazishdi va gol urish uchun yaxshi imkoniyat yaratishdi, ammo Karachikning zarbasiga aniqlik yetishmadi.

Shu tariqa, Eron terma jamoasi hal qiluvchi o‘yinda 5:4 hisobida g‘alaba qozonib, musobaqa g‘olibiga aylandi. O‘zbekiston esa 6 ochko bilan 2-o‘rinni qo‘lga kiritdi. Uchinchi pog‘ona Tojikistonga nasib etdi. Ular 3-turda Qirg‘iziston ustidan 4:2 hisobida g‘alaba qozonishdi.

«CAFA Womenʼs Futsal Championship 2023», 3-tur
Qirg‘iziston - Tojikiston - 2:4

O‘zbekiston - Eron - 4:5 (1:3)
Gollar: Gulzoda Amirova 4ʼ, Sara Shirbegi 8ʼ, 16ʼ, Mahsa Kamali 11ʼ, Lyudmila Karachik 23ʼ, 26ʼ, Umida Zoirova 33ʼ, Fereshteh Karimi 35ʼ, Mahsa Kamali 36ʼ.