Bugun Antaliyada “Andijon” Rossiya Premyer-ligasi vakili – Voronejning “Fakel” jamoasiga qarshi o‘rtoqlik uchrashuvini o‘tkazdi.
Qiziqarli va gollarga boy o‘tgan bellashuvdan so‘ng “Fakel” bosh murabbiyi Dmitriy Pyatibratov “Andijon” matbuot xizmati uchun biroz vaqt ajratdi.
- Dmitriy Anatolyevich, bugungi o‘yindan sizda qanday taassurot qoldi?
- Yaxshi raqib, yaxshi o‘yin bo‘ldi. Asosiy tarkib o‘yinchilari yoqdi, to‘p bilan yaxshi harakatlanishdi. Ular almashtirilganidan keyin bizga ancha yengillik tug‘ildi. Sparring-raqibimizdan to‘la qoniqdim, toza futbol o‘ynashdi. Bir-birlarini hurmat qilgan holda to‘p surishdi. O‘yin uchun raqib jamoaga rahmat aytaman.
- “Andijon” tarkibida ko‘proq qaysi futbolchilarning o‘yini yoqdi?
- Yo‘q, men kimnidir ajratib ko‘rsata olmayman. Umumjamoa sifatida o‘yini yoqdi, menga. Mazmunli o‘yin namoyish etmoqda. Kombinasiyalar orqali harakat qilishdi va “Andijon” hurmatga loyiq. Bunday yaxshi jamoa bilan o‘ynash imkoni bo‘lganidan xursandman.
- Hisobda aks etgan 4:1 natijasini kutmaganmidingiz?
- Bilasizmi, hozir hisobga qaraydigan payt emas. Asosiysi, o‘yin sifatini shakllantirib borish. Ikkala jamoa ham chempionatga tayyorgarlik ko‘rmoqda. Shuning uchun e’tibor mashg‘ulotlarga qaratilgan. Bunday paytda futbolchilarni harakatlarini kuzatish muhim sanaladi. Hozir hisob hech nimani hal qilmaydi.
- Hozir qishki yig‘in davom etyapti. Bosh murabbiy sifatida jamoangizda o‘zbekistonlik futbolchilar ham to‘p surishini istarmidingiz?
- Yuqori saviyadagi ko‘plab o‘yinchilar mavjud, bu sir emas. Ayni paytda barcha pozisiyalarimiz bo‘yicha o‘yinchilarimiz bor va tarkibimiz shakllanib bormoqda. Bizning jamoada mutaxassislar dunyo bo‘yicha barcha futbolchilarni kuzatib borishadi. Agar tarkibimizni kuchaytiradigan o‘zbek futbolchilari jamoamizda bo‘lishsa, bundan xursand bo‘laman, albatta.
- Umuman olganda, bizning futbolimiz haqida taassurotlaringiz qanday?
- Biz qozoq, o‘zbek va tojik jamoalarini doim ko‘rib boramiz. Bu yerdagi yig‘inlarda ham kuzatamiz. Futbolingiz haqida juda yaxshi taassurotlarim mavjud.
