Eshitish yoki ko‘rishga ulgurgandirsiz, o‘yin uslubi va zarba yo‘llash manyovri ozgina bo‘lsada Krishtianu Ronaldukiga o‘xshab ketadigan, vaqtida katta umidlar uyg‘otgan Sardor Rashidov faoliyatida oz emas-ko‘p emas, naq 11-marta klubini almashtirdi.
Agar eslolmayotgan bo‘lsangiz, O‘zbekiston milliy jamoasi sobiq yarim himoyachisining futbolchilik faoliyatidagi «sayohat»ini ketma-ketlikda yodga solishimiz mumkin:
«So‘g‘diyona» > «Bunyodkor» > «Al-Jaish» > «Al-Jazira» > «Lokomotiv» > «Nasional» > «Qatar SK» > «Paxtakor» > «Quvayt SK» > «Paxtakor» > «Umm Salal» > «Paxtakor»...
Vaqtida transferi 2 million yevroga baholangan Sardor Rashidov bu orada 32 yoshni urib qo‘yibdi. Shunday ekan, unda kamida yana 1-2 yil «soqqa qilish» imkoniyati bor. Buning uchun esa arab klublaridan yaxshiroq variant yo‘q, albatta. To‘g‘risi, Sardor Portugaliyaning «Nasional» klubi safiga qo‘shilganida, qanchalik quvongandik-a... Ayniqsa, birdaniga «xet-trik» qayd etgani barchamizni cheksiz to‘lqinlantirib yuborgani - ayni haqiqat. Afsuski, istiqboli baland baholangan futbolchi shu bilan to‘xtadi, biz kutgan darajaga o‘tolmadi. Unga nima bo‘lgani - bizga qorong‘u. Lekin «Nasional» orqali Yevropaning kuchli 5ta ligasi klublaridan biriga yo‘l olishiga umid bog‘laganimiz bor gap.
Afsus, unga yana o‘sha mentalitetga bog‘liq eski muammo xalaqit berdi, chog‘i. «Rashidovning arab klubiga o‘tganidan xursandmiz. Har holda, u endi yana allaqachon byudjet klubiga aylangan «Paxtakor»dan maosh olmaydi. Xorij klubiga o‘tadigan futbolchilarning nafaqat o‘zbek futboli, balki mamlakat taraqqiyoti, byudjetiga ham foydalari tegishi sir emas. Buni anglash uchun Odil Ahmedovning Namanganda nimalar qilayotgani-yu, Otabek Shukurovning Qarshi va o‘zi tug‘ilib-ulg‘aygan Chiroqchida qanday ishlarni amalga oshirganini eslash kifoya qiladi. Shunday ekan, Sardorga aytadigan gapimiz bitta - «Soqqani bos!» 2021 yilning 18 iyul kuni shu postni yozgan ekanman. Sardor orada «Paxtakor»ga qaytish va ketishga ham ulgurdi. Deylik, o‘tgan mavsum «Qizilqum»ga supergol urish uddasidan chiqqan Rashidov yana bir bor Qatarda «gullaydigan» bo‘lgandi, «Umm Salal» klubida.
Mana, yaqinda so‘nggi yillarda odat tusiga aylanib qolgan holat yuz berdi. Sardor Rashidov bir necha oylik «sayohat»dan keyin yana O‘zbekistonga qaytdi. Shunday ekan, uning attraksionga o‘xshash faoliyati davom etadi:
1. «So‘g‘diyona»
2. «Bunyodkor»
3. «Al-Jaish» (Qatar)
4. «Al-Jazira» (BAA)
5. «Lokomotiv»
6. «Nasional» (Portugaliya)
7. «Qatar SK» (Qatar)
8. «Paxtakor»
9. «Al-Quvayt» (Quvayt)
10. «Paxtakor»
11. «Umm-Salal» (Qatar)
12. «Paxtakor»
