O‘zbekiston U-20 terma jamoasi bosh murabbiyi Ravshan Haydarov Osiyo kubogi oldidan tashkil etilgan matbuot anjumanida ishtirok etdi.

U-20 Osiyo kubogi haqida:
— Barchaga assalomu alaykum. O‘zbekistonga xush kelibsiz. Biz bu turnirni intizorlik bilan kutdik. Nafaqat jamoa, balki mahalliy tashkiliy qo‘mita tomonidan musobaqaga uzoq tayyorgarlik ko‘rildi. Umuman olganda, biz turnirga tayyormiz.

Musobaqaning O‘zbekistonda o‘tkazilishi jamoaga qay darajada ta’sir qiladi:
— Albatta, O‘zbekistonda o‘tayotgan musobaqada barcha jamoalar o‘z oldiga aniq maqsadlar qo‘yishgan. Xususan, biz ham. Yurtimizda o‘tayotgan bu turnirda zafar quchib, Indoneziyada o‘tkaziladigan Jahon chempionatiga yo‘l olishni maqsad qilganmiz.

— Raqiblar haqida:
Barcha jamoalarni hurmat qilamiz, o‘ylashimcha, ularni yetarlicha o‘rganishga harakat qildik.

Xalqaro maydondagi tajriba haqida:
— Bilasiz, pandemiya tufayli bu yosh toifasidagi bir nechta turnirlar qoldirilgan. Biroq biz reja bo‘yicha ishladik. Bir nechta yig‘inlar o‘tkazib, kuchli jamoalarga qarshi xalqaro o‘rtoqlik uchrashuvlarida ishtirok etdik. Umuman olganda, yetarli darajada tayyorgarlik olib bordik. Barcha futbolchilar musobaqaga tayyor. Barcha jamoalarga omad tilayman.