Ўзбекистон U-20 терма жамоаси бош мураббийи Равшан Ҳайдаров Осиё кубоги олдидан ташкил этилган матбуот анжуманида иштирок этди.

U-20 Осиё кубоги ҳақида:
— Барчага ассалому алайкум. Ўзбекистонга хуш келибсиз. Биз бу турнирни интизорлик билан кутдик. Нафақат жамоа, балки маҳаллий ташкилий қўмита томонидан мусобақага узоқ тайёргарлик кўрилди. Умуман олганда, биз турнирга тайёрмиз.

Мусобақанинг Ўзбекистонда ўтказилиши жамоага қай даражада таъсир қилади:
— Албатта, Ўзбекистонда ўтаётган мусобақада барча жамоалар ўз олдига аниқ мақсадлар қўйишган. Хусусан, биз ҳам. Юртимизда ўтаётган бу турнирда зафар қучиб, Индонезияда ўтказиладиган Жаҳон чемпионатига йўл олишни мақсад қилганмиз.

— Рақиблар ҳақида:
Барча жамоаларни ҳурмат қиламиз, ўйлашимча, уларни етарлича ўрганишга ҳаракат қилдик.

Халқаро майдондаги тажриба ҳақида:
— Биласиз, пандемия туфайли бу ёш тоифасидаги бир нечта турнирлар қолдирилган. Бироқ биз режа бўйича ишладик. Бир нечта йиғинлар ўтказиб, кучли жамоаларга қарши халқаро ўртоқлик учрашувларида иштирок этдик. Умуман олганда, етарли даражада тайёргарлик олиб бордик. Барча футболчилар мусобақага тайёр. Барча жамоаларга омад тилайман.