Oldin xabar berganimizdek, bundan biroz avval yoshlarimiz 1-turda Suriya termasini 2:0 hisobida dog‘da qoldirdi. Jamoa bosh murabbiyi Ravshan Haydarov mazkur o‘yindan so‘ng o‘z taasurotlari bilan o‘rtoqlashdi.

"Avvalambor, barchani futbol bayrami bilan tabriklayman va tabiiyki muxlislarimizni xursand qila oldik, deb o‘ylayman. To‘g‘risi, ushbu o‘yin qiyin kechishini bilardik va bunga tayyor edik. Ular juda yaxshi shakllangan jamoa ekanliklarini ko‘rsata olishdi, desam xato bo‘lmaydi.

Ammo, biz yakuniy vaziyatlar borasida ishlashimiz kerak. G‘alabaga bo‘lgan kuchli va ortiqcha ishtiyoq tufayli hujumlarga nuqta qo‘yishda qiynaldik. Xayriyatki, standartlardan gol urganimiz xursand qildi.

Albatta, har qanday jamoada 1- o‘yinda muammolar bo‘ladi. O‘yindan o‘yinga kuchayib boramiz. Iroqqa qarshi keyingi bahsga tayyorgarlik hozirdan boshlanadi. Bu g‘alaba bilan hali hech narsa hal bo‘lgani yo‘q.

Umarali Rahmonaliyevning xatolari? Jamoa sardori bo‘lgani bois faol bo‘lishga va mas’uliyatni o‘z zimmasiga olishga harakat qildi. Birinchi o‘yinda xatolar bo‘lib turadi.

Abbos Fayzullayevni hisob ishonchli ko‘rinishga kelgani uchun almashtirdik...", — dedi Ravshan Haydarov.