Taniqli jurnalist Qahramon Aslanov saytimizda ijod qilgan "Hasanali ota" - Mirakmal Jamilovning vafotiga munosabat bildirdi.
"Hasanali ota, asl ismlari Mirakmal Jamilov bilan «Chempion»da birga ishlaganmiz. Soatlab telefonda gaplashardik, ko‘rishganman, uylariga borganman, kampirlari bilan yolg‘iz, suyanib yashardilar.
Taxallus tanlanishi ham qiziq. Nega Hasanali ota? «O‘tgan kunlar»dagi qul obrazi. «Siz yoshlarni qarigan chog‘imda topdim, hammalaring men uchun Otabeksizlar, sizlarga qul bo‘lib xizmatlaringni qilay, shuning uchun Hasanali otangizman» degandilar.
Adabiyotga juda qiziqardilar, uylari to‘la kitob. Bir vaqtlar qiziqib, hikoyalar yoza boshlaganimda, ilk tanqidchim, hamma maqtaganda, u inson hikoyalarning juda bo‘sh ekani, g‘oya bo‘lsa-da, muallif buni satrlar orasiga yashirishi kerakligini ta’kidlagan, tahrirlab beraman, deb, shu bilan qolib ketgan. Bir necha yil oldin ayoli vafot etganini, o‘zi og‘ir kasallikka chalinganini eshitdim, ammo ancha bo‘lgandi gaplashmaganimga. Yo‘q, aslida, otaning blogini o‘qib borganman, doimgidek formada edilar.
Ko‘p yozganlarim keyinroq o‘zimga yoqmagan holatlar bo‘lgan, ammo chinakam pushaymon bo‘lganim, bir marta, yaxshi eslayman. «Gazprom» MDH xududida qanaqadir Superliga tuzish g‘oyasi bilan chiqdi, Gazzayev loyiha direktori bo‘ldi, bir muddat shu mavzu dolzarb bo‘lib turdi. O‘shanda «MDH madhi» degan tekst yozdim, bunday chempionat futbolimizga, terma jamoamizga foyda bo‘lishi haqida asoslar surdim. O‘shanda Mirakmal aka meni qattiq koyib bergan, hatto begona odamni ayblagandek, meni sotqinga chiqarib, maqola ham yozgandilar. Xafa bo‘lganman, men faqat futbol haqida yozganman, boshqasi bilan ishim yo‘qku, deb o‘zimni oqlaganman ham, ammo rostan ham noto‘g‘ri edi. Hozir buni ko‘rib turibmiz, bu yerlarda, Rossiya bilan siyosatdan holi munosabat bo‘lishi mumkin emas.
Xasanali ota biroz murakkab, tushunish qiyin tilda yozardi. Ilg‘ab olmasangiz, ba’zida qiynalasiz. Sal oddiyroq yozsangiz bo‘lmaydimi, ko‘pchilik o‘qirdi, desam, «yo‘q, uch kishi o‘qisa ham, meni tushunib, his qilib o‘qiydi-ku, o‘sha uch kishi uchun yozaveraman, ular men uchun qadrli» der edilar.
Mirakmal aka vafot etibdilar. Joylari jannatda bo‘lsin. Eng ko‘p o‘sha uch kishiga achinaman. Bizni ko‘pchilik o‘qigani bilan bizdaqalar ham ko‘pchilik, ertaga biz yozmay qo‘ysak, indinga vafot etsak, o‘quvchilarimiz boshqalarni o‘qib ketaveradi. Ammo endi, o‘sha uch kishi nima qiladi? Kimni o‘qiydi?
Uch kishi, ta’ziyamni qabul qiling. Alloh sabr bersin" - deb post qoldirdi Qahramon Aslanov.
