«Milan»ning hujumkor yarim himoyachisi Braim Dias tizzasidagi muammolar tufayli A Seriyaning shanba kuni bo‘lgan «Fiorentina»ga qarshi o‘yinini o‘tkazib yubordi.
Yakshanba kuni 23 yoshli ispaniyalik asosiy guruhdan alohida mashg‘ulot o‘tkazdi. Diasning Chempionlar ligasi doirasidagi «Tottenxem»ga qarshi o‘yindagi ishtiroki bo‘yicha qaror dushanba kuni qabul qilinadi.
Shu bilan birga, Sky Sport Italia jurnalistlari ispaniyalik futbolchi hech bo‘lmaganda zaxira o‘rindig‘ida bo‘lishini taxmin qilmoqda.
«Tottenxem» – «Milan» uchrashuvi 8 mart, chorshanba kuni Londonda bo‘lib o‘tadi. Dastlabki o‘yinda «rossonerilar» o‘z maydonida «shporlar»ni 1:0 hisobida mag‘lub etishga muvaffaq bo‘lgandi.
2022/2023 yilgi mavsumda Braim Dias 28 ta o‘yinda 5 ta gol urdi va 2 ta golli uzatmani amalga oshirdi.