«Милан»нинг ҳужумкор ярим ҳимоячиси Браим Диас тиззасидаги муаммолар туфайли А Сериянинг шанба куни бўлган «Фиорентина»га қарши ўйинини ўтказиб юборди.
Якшанба куни 23 ёшли испаниялик асосий гуруҳдан алоҳида машғулот ўтказди. Диаснинг Чемпионлар лигаси доирасидаги «Тоттенхэм»га қарши ўйиндаги иштироки бўйича қарор душанба куни қабул қилинади.
Шу билан бирга, Sky Sport Italia журналистлари испаниялик футболчи ҳеч бўлмаганда захира ўриндиғида бўлишини тахмин қилмоқда.
«Тоттенхэм» – «Милан» учрашуви 8 март, чоршанба куни Лондонда бўлиб ўтади. Дастлабки ўйинда «россонерилар» ўз майдонида «шпорлар»ни 1:0 ҳисобида мағлуб этишга муваффақ бўлганди.
2022/2023 йилги мавсумда Браим Диас 28 та ўйинда 5 та гол урди ва 2 та голли узатмани амалга оширди.
