Юлдуз ҳужумчи Эрлинг Холанднинг отаси Алф-Инге Холанд ўғлининг келажаги ҳақида фикр билдирди. Катта Холанд ҳар бир футболчи «Реал»да ўйнашни орзу қилиши ҳақидаги гаплари билан кўпчиликнинг эътиборини тортди.
«Эрлинг «Манчестер Сити»да жуда бахтли, унинг клуб билан узоқ муддатли шартномаси бор. Биз янги мавсумни кутмоқдамиз, аммо «Реал»да ўйнашни ҳар қандай футболчи хоҳлаган бўларди. Футболда нима содир бўлишини ҳеч қачон олдиндан била олмайсан», — дея катта Холанднинг сўзларини келтиради The Touchline нашри DAZN эфирига таяниб.
Бундан олдинроқ Холанднинг отаси ўғли фаолияти давомида барча топ-лигаларда ўз кучини синаб кўриш истаги борлиги ҳақида гапирган эди.
Эслатиб ўтамиз, 25 ёшли Эрлинг Холанднинг «Манчестер Сити» билан амалдаги шартномаси 2034 йилнинг ўрталарига қадар мўлжалланган.
