Yulduz hujumchi Erling Xolandning otasi Alf-Inge Xoland o‘g‘lining kelajagi haqida fikr bildirdi. Katta Xoland har bir futbolchi «Real»da o‘ynashni orzu qilishi haqidagi gaplari bilan ko‘pchilikning e’tiborini tortdi.
«Erling «Manchester Siti»da juda baxtli, uning klub bilan uzoq muddatli shartnomasi bor. Biz yangi mavsumni kutmoqdamiz, ammo «Real»da o‘ynashni har qanday futbolchi xohlagan bo‘lardi. Futbolda nima sodir bo‘lishini hech qachon oldindan bila olmaysan», — deya katta Xolandning so‘zlarini keltiradi The Touchline nashri DAZN efiriga tayanib.
Bundan oldinroq Xolandning otasi o‘g‘li faoliyati davomida barcha top-ligalarda o‘z kuchini sinab ko‘rish istagi borligi haqida gapirgan edi.
Eslatib o‘tamiz, 25 yoshli Erling Xolandning «Manchester Siti» bilan amaldagi shartnomasi 2034 yilning o‘rtalariga qadar mo‘ljallangan.
