Мадриднинг "Реал" клуби ҳужумчиси Винисиус Жуниорнинг яқинлари футболчининг "Вильярреал"га қарши учрашувда (1:0) майдондан четлатилишини асосли деб ҳисобламоқда. Бироқ улар ҳакамликдаги айрим номутаносиб қарорлардан норози.
Бразилиялик футболчи Испания Ла Лигаси доирасидаги мазкур баҳснинг иккинчи бўлими бошида захирадан майдонга тушди. 71-дақиқада у рақиб дарвозасини ишғол қилди, аммо гол бекор қилинди.
Бунга 26 ёшли вингернинг голли ҳужум давомида рақиб футболчисининг сочидан тортиши сабаб бўлди. Вазият қайта кўриб чиқилгач, Винисиусга тўғридан-тўғри қизил карточка кўрсатилди.
Журналист Марио Кортегананинг хабар беришича, Винисиуснинг яқинлари ҳакамнинг уни майдондан четлатиш ҳақидаги қарорини тўғри деб ҳисобламоқда. Шунга қарамай, улар 2025 йил бошида юз берган ўхшаш вазиятни эслаб, ҳакамлар қарорларида изчиллик йўқлигидан норозилик билдирган.
Ўшанда "Валенсия" дарвозабони Винисиуснинг сочидан тортган, бироқ бу ҳаракати учун қизил карточка олмаган эди. Шу сабабли бразилиялик футболчининг атрофидагилар ўхшаш вазиятларга турлича баҳо берилаётганини танқид қилмоқда.
Айни пайтда Винисиус икки ёки учта ўйинга дисквалификация қилиниши мумкин. Агар шундай қарор қабул қилинса, у катта эҳтимол билан "Барселона"га қарши бўлиб ўтадиган "эл-класико"ни ўтказиб юборади.
