O‘tgan yozda "PSJ" bosh murabbiyligiga tayinlangan Kristof Galtye jamoaning asosiy muammosini yecha olmadi. Parijliklar Yevropa chempionlar ligasi 1/8 finalida "Bavariya"ga umumiy hisobda 3:0 hisobida imkoniyatni boy berib, turnirdan chiqib ketishdi. Shundan so‘ng fransuz grandi rahbariyati yana bosh murabbiyni almashtirish variantini oldinga surishmoqda va bu yozda amalga oshishi mumkin.

Agar Galtye yozda iste’foga chiqariladigan bo‘lsa, "PSJ" yana Zinedin Zidan variantiga qaytishi mumkin. Avvallari ham Zidanning yo‘lini "PSJ" bilan ko‘p marta bog‘lashgan, biroq bu safar barchasi jiddiy. Lekin, hozircha Zidan qanday fikrda ekani va u bu ishga rozi bo‘ladimi yoki yo‘qmi, noma’lum.

Zidanning PSJ bosh murabbiyi bo‘lishining sabablari

"PSJ" muxlislari optimizmining asosiy sababi Zidanning Fransiya terma jamoasida bo‘sh o‘rin kutayotgani, ammo Didye Desham shartnomasini 2026 yilgacha uzaytirganidir.

Bu Zidanning murabbiylikka qaytishi mumkin bo‘lgan bir yo‘lni istisno qiladi, shu bilan birga u hozir "Real Madrid"ga qaytishi dargumon, garchi "Santyago Bernabeu" har doim uning uyi bo‘lib qolsa-da.

Italiyada uning "Yuventus" boshqaruvini qo‘lga olish imkoniyati bor, ammo hozir Turin klubiga o‘tish uchun ideal vaqt emas.

Til muammosi sabab Zidanning Angliya yoki Germaniyaga ketishi g‘oyasi real emas.

Bularning barchasi 50 yoshli murabbiy uchun "PSJ"ni yanada jozibador variantga aylantiradi. Marselda tug‘ilgan bo‘lsa ham, bu ZiZu uchun to‘siq hisoblanmaydi.

"Hech qachon hech qachon demang", dedi u L'Equipe gazetasiga bergan intervyusiga.