"Liverpul" hujumchisi Darvin Nunyes Angliya Premyer-ligasining 27-turi doirasida "Bornmut"ga qarshi o‘yindan oldingi fikrlari bilan o‘rtoqlashdi. Uchrashuv bugun, 11-mart kuni bo‘lib o‘tadi. O‘yin Toshkent vaqti bilan 17:30da boshlanadi.
"Albatta, biz hozir "Manchester Yunayted"ni 7:0 hisobida mag‘lub etganimiz uchun hotirjamlikka berila olmaymiz. Biz bu o‘yinga bir xil fikrlash va g‘alaba qozonish istagi bilan yondashishimiz kerak va uch ochko olib kelishimiz kerak.
Birinchi davrada ularni adashmasam 9:0 hisobida mag‘lub etgandik, hozir esa boshqa o‘yin. Biz ularni yana bir bor mag‘lub etish uchun u yerga borishimiz kerak. "Manchester Yunayted" bilan bo‘lgan voqeaga o‘xshaydi, ular bizni o‘z uylarida mag‘lub etishdi, endi esa boshqacha o‘yin bo‘ldi va biz yettita gol urishga muvaffaq bo‘ldik. Bu futbol - hammasi boshqacha bo‘lishi mumkin.
Ular o‘yinga munosib formada kirishadi, ularning o‘yinida qanday o‘zgarishlar qilganini ko‘rishingiz mumkin. Masalan, "Arsenal" bilan ular ajoyib o‘yin ko‘rsatishdi va ular so‘nggi daqiqada gol o‘tkazib yuborishdi - bu futbol", - dedi Nunyes "Liverpul" rasmiy saytiga.
