O‘zbekiston yoshlar terma jamoasi bosh murabbiyi Ravshan Haydarov va futbolchi Po‘latxo‘ja Xoldorxonov Koreyaga qarshi uchrashuv oldidan matbuot anjumanida ishtirok etishdi.

Ravshan Haydarov

Ertangi o‘yin haqida:
Barchaga assalomu alaykum. Avvalambor, bu bosqichga yetib kelgan jamoalarni tabriklayman. Shu o‘rinda, muxlislarimizga, futbolchilarga, ularning ota-onalari hamda tarbiyalagan murabbiylariga minnatdorchilik bildiraman.

Ertaga bizni muhim uchrashuv kutib turibdi. Tiklanish-tayyorgarlik jarayonlari reja bo‘yicha yaxshi o‘tdi, o‘ylaymanki, yarim finalda o‘zimiz uchun kerakli bo‘lgan natijani qo‘lga kiritamiz.

Futbolchilarning ayni paytdagi holati haqida:
Biz terma jamoaga eng munosib nomzodlarni chaqirganmiz. Bizda 23 nafar kuchli futbolchi bor. Ular individual mahoratli. Lekin biz uchun jamoaviy o‘yin muhim hisoblanadi. Aynan shuning ustida doimiy ishlab boryapmiz va e’tiborimizni shunga qaratganmiz.

Koreyaga qarshi o‘yin uslubi haqida:
Avstraliyaga qarshi o‘tgan bahsda juda ko‘p vaziyatlar yaratdik. Agar siz yutishni xohlasangiz, gol urishingiz, vaziyatlar yaratishingiz kerak.

Koreya hujumda yaxshi harakat qiladi. Ular barcha o‘yinlarda birinchi raqamli bo‘lib harakat qilishdi. Jamoaning hujum va yarimhimoyasida tezkor futbolchilar bor. Biroq biz ham o‘zimizning o‘yinimiz, rejamiz bo‘yicha maydonga tushamiz.

Po‘latxo‘ja Xoldorxonov

Ertangi o‘yin haqida:
Assalomu alaykum. Barcha yurtdoshlarimizni Jahon chempionati yo‘llanmasi va yarim final bilan tabriklayman. Ertaga o‘z o‘yinimizni namoyish etib g‘alaba qozonishni maqsad qilganmiz.

Minglab muxlislar qarshisida o‘ynash haqida:
Bu ajoyib. Ular bizni qo‘llab-quvvatlamoqdalar. Hech qanday bosim emas, ularning qarshisida o‘ynash yoqimli va qo‘shimcha kuch beradi.

Raqib haqida:
Koreya o‘ziga yarasha kuchli jamoa. Biz ularning o‘yinini o‘rgandik, barcha jamoada bo‘lgani singari ularning ham kuchli va kuchsiz tomonlari bor. Ertaga o‘z o‘yinimizni namoyish etib, turnir chempionligi uchun kurashishda davom etamiz.