Ўзбекистон ёшлар терма жамоаси бош мураббийи Равшан Ҳайдаров ва футболчи Пўлатхўжа Холдорхонов Кореяга қарши учрашув олдидан матбуот анжуманида иштирок этишди.

Равшан Ҳайдаров

Эртанги ўйин ҳақида:
Барчага ассалому алайкум. Авваламбор, бу босқичга етиб келган жамоаларни табриклайман. Шу ўринда, мухлисларимизга, футболчиларга, уларнинг ота-оналари ҳамда тарбиялаган мураббийларига миннатдорчилик билдираман.

Эртага бизни муҳим учрашув кутиб турибди. Тикланиш-тайёргарлик жараёнлари режа бўйича яхши ўтди, ўйлайманки, ярим финалда ўзимиз учун керакли бўлган натижани қўлга киритамиз.

Футболчиларнинг айни пайтдаги ҳолати ҳақида:
Биз терма жамоага энг муносиб номзодларни чақирганмиз. Бизда 23 нафар кучли футболчи бор. Улар индивидуал маҳоратли. Лекин биз учун жамоавий ўйин муҳим ҳисобланади. Айнан шунинг устида доимий ишлаб боряпмиз ва эътиборимизни шунга қаратганмиз.

Кореяга қарши ўйин услуби ҳақида:
Австралияга қарши ўтган баҳсда жуда кўп вазиятлар яратдик. Агар сиз ютишни хоҳласангиз, гол уришингиз, вазиятлар яратишингиз керак.

Корея ҳужумда яхши ҳаракат қилади. Улар барча ўйинларда биринчи рақамли бўлиб ҳаракат қилишди. Жамоанинг ҳужум ва яримҳимоясида тезкор футболчилар бор. Бироқ биз ҳам ўзимизнинг ўйинимиз, режамиз бўйича майдонга тушамиз.

Пўлатхўжа Холдорхонов

Эртанги ўйин ҳақида:
Ассалому алайкум. Барча юртдошларимизни Жаҳон чемпионати йўлланмаси ва ярим финал билан табриклайман. Эртага ўз ўйинимизни намойиш этиб ғалаба қозонишни мақсад қилганмиз.

Минглаб мухлислар қаршисида ўйнаш ҳақида:
Бу ажойиб. Улар бизни қўллаб-қувватламоқдалар. Ҳеч қандай босим эмас, уларнинг қаршисида ўйнаш ёқимли ва қўшимча куч беради.

Рақиб ҳақида:
Корея ўзига яраша кучли жамоа. Биз уларнинг ўйинини ўргандик, барча жамоада бўлгани сингари уларнинг ҳам кучли ва кучсиз томонлари бор. Эртага ўз ўйинимизни намойиш этиб, турнир чемпионлиги учун курашишда давом этамиз.