Yevropa konferensiyalar ligasi nimchorak final bosqichi o‘yinlari yakuniga yetib, chorak finalga chiqqan barcha jamoalar nomi aniq bo‘ldi. Endi navbat chorak final, yarim final va final uchun qur’a tashlash marosimiga.

Qachon va qayerda?
Qur’a tashlash marosimi 17 mart, juma kuni Toshkent vaqti bilan 17:00da UYEFA qarorgohi joylashgan Shveysariyaning Nyon shahrida bo‘lib o‘tadi.

Ishtirokchi-jamoalar
Yevropa konferensiyalar ligasining chorak finaliga quyidagi 8 jamoa chiqdi:

"Alkmaar" (Niderlandiya)
"Anderlext" (Belgiya)
"Bazel" (Shveysariya)
"Vest Xem" (Angliya)
"Gent" (Belgiya)
"Lex" (Polsha)
"Nissa" (Fransiya)
"Fiorentina" (Italiya)

Qur’a mexanizmi
Qur’a "ko‘r-ko‘rona" tarzda o‘tkaziladi. Jamoalar savatchalarga ajratilmaydi. Hech qanday cheklovlar yo‘q. Bir mamlakat vakillari hamda bir guruhda ishtirok etgan jamoalar o‘zaro to‘qnash kelishlari mumkin. Qur’ada birinchi tortilgan jamoa ikkinchi klub bilan to‘qnash keladi; uchinchi jamoa to‘rtinchi jamoa bilan va hokazo. Qur’ada birinchi tortilgan klub chorak finalning dastlabki o‘yinini o‘z maydonida o‘tkazadi.

Yarim final qur’asi
Musobaqaning yarim finaliga qur’a tashlash marosimi ham shu kunning o‘zida o‘tkaziladi. Finalda esa nominal mezbonni aniqlash uchun qur’a tashlanadi.

Mehmondagi gol qoidasi
Yevrokuboklarda mehmondagi gol qoidasi mavsum-2021/22dan boshlab bekor qilingan. Agar ikki o‘yin natijasiga ko‘ra hisob teng bo‘lsa, qo‘shimcha bo‘limlar belgilanadi. Unda ham g‘olib aniqlanmasa, penaltilar tepiladi.

Taqvim
Chorak final o‘yinlari 13 aprel hamda 20 aprel kunlari o‘tkaziladi. Yarim final esa 11 may va 18 may sanalariga belgilangan. Final 7 iyun kuni Pragadagi "Eden Arena"da bo‘lib o‘tadi.